Las XII tablas: Publicación de Información Jurídica

Los Cortinos y L'aldu de les Abeyes

30 de Junio de 2009 | Artículo escrito por Ignacio Arias Díaz | El mio queríu amigu Antonio García Linares, perlleíu n’historia y tradiciones d’Asturies y fiel siguidor, per ello, del derechu consuetudinariu asturianu faime'l suxerimientu de que s’amieste como figura tradicional d’esta rama del derechu'l denomáu derechu d’aldu, de la cuala la so vixencia ta acreitada, polo menos, nel conceyu d’Allande del que García Linares ye nacíu.

Falar de cortinos y abeyes, ensin mentar a Xuacu López Álvarez, autor del llibru <<Las abejas, la miel y la cera en la sociedad tradicional asturiana>> que constitúi un auténticu tratáu na materia sedría atribuyinos méritos y conocencies que nun tenemos.

Dicho esto, y amestando los datos d’estes dos fuentes, asina como los que me proporciona’l mio tamién bon amigu José Naveiras Escanlar, Pepe’l Ferreiru, tamos ya en condiciones de facer un primer averamientu a esta potencial figura del Derechu Consuetudinariu.

Digamos antemanadamente que l’aldu ye’l vuelu, el rumbu, el camín que siguen les abeyes nes sos entraes y salíes al colmenal.

Pa entender el so significáu, el so algame y la so inxertadura n’apicultura, ye preciso facer una referencia curtia a la importancia d’esta actividá n’Asturies -sobre too na so zona occidental- y a los dos sistemes d’asitiamientu de los truébanos na tradición rural asturiana.

El Catastru del Marqués de La Ensenada danos un datu que da fe del pesu d’esta actividá: nel sieglu XVIII'l Conceyu d’Allande yera'l mayor productor de miel d’Asturies, con 5.691 truébanos. La redolada de Tras del Palo, la más rica de tol conceyu con 3.347 truébanos y 1.055 ensames. El sesenta por cientu de les families declaraben tener truébanos nesta dómina.

Esta actividá sigue viva nos tiempos posteriores, hasta’l puntu de que nel añu 1931, la media de truébanos que tenía cada vecín del Valledor yera de 20.

Agora, la importancia del miel -yera l’únicu productu p’azucrar conocíu- y del so subproductu -la cera- t’arrequexada cola apaición del azucre y de la estearina y la parafina, pero entá güei ye dalgo polo que la xente nagua a la vista de les sos cualidaes melecineres y pal so usu na cocina de lo que dan fe perbien de refranes qu’aportaron hasta los nuestros díes: <<Come mucha miel y vivirás mucho bien>>>;<<Vinagre y miel saben mal y hacen bien>>;<<Alimenta tanto la miel de las abejas, como la leche de las ovejas>>;<<Miel y queso sabe a beso>> y <<Bollu de mantega untáu en miel ¿a quién nun sabe bien?>>.

Poro, anque l’actividá apícola ta enforma amenorgada, caltién una razonable importancia no zona onde tovía suel dase.

Dicho esto, la forma tradicional d’esplotación de les abeyes nel mediu rural del occidente asturianu faese pente medies de los denomaos truébanos  <<fixistes>>, que son nos que los caxellos tan apegaos al recipiente y sólo puen sacase rompiéndolos.
Los truébanos asítiense en dos llugares estremaos: dientro del pueblu, casi siempre protexíos por horros y paneres, o nel monte, alloñaos del nucleu de población.

Nesti caberu casu, pa protexer los truébanos constrúyense los denomaos cortinos, cortines o cortixos, puestos y talameiros.

En particular, los cortinos son construcciones xeneralmente circulares -anque tamién hailos, los menos, de planta cuadrada- de les cuales la so función principal ye la de protexer los tuébanos de los osos, melandros, raposos y hasta de los rebaños -los que pastien en monte baxo-.

Son precisamente estes construcciones el caldu de cultivu -nunca meyor dicho- del derechu del aldu y de les sos particularidaes n’Asturies.

Asina ye, l’allugamientu de los cortinos nun yera llabor menor, pues teníen de dase les meyores condiciones pa facer más fácil l’aldu, el movimientu d’entrada y salida de les abeyes.

Precisamente por ello, n’Asturies, a la hora de construyise'l cortín nun se tien en cuenta la distancia hasta otru que yá hubiere ellí allugáu enantes, como pasa nel restu de les Comunidaes Autónomes que tienen llexislao sobre l’actividá apícola. Lo valoratible ye, únicamente, si les abeyes del cortín nuevu puen torgar l’aldu, les rutes d’entrada y salida de les abeyes del cortín vieyu.

Esto vese bien colos exemplos que van darréu. N’Estremadura, los colmenales con más de 75 truébanos nun puen allugáse a menos de 200 metros de cualquier otru colmenal; en La Rioja tienen de respetar unes distancies mínimes que salen d’una formula matemática que parte de la suma de radios d’aición del colmenal yá colocáu, del que se va colocar y de la capacidá de la zona pa dar miel demientres el tiempu de la collecha; nel País Vascu, los colmenales que tienen 26 truébanos vivos tienen de respetar una distancia de 1.000 metros a los llenderos; n’Aragón, la distancia mínima ente colmenales ye de 500 metros, amestando 10 metros por caún de los colmenales que pasen de los 50 truébanos.

N’Asturies, repetimos, lo determinante ye si’l nuevu cortín torga’l camín d’entrada y salida de les abeyes, non la distancia.

Esta costume, que vien d’antiguu, tien -como toles costumes- una esplicación que nun almite retruque. N’Asturies, tierra ribayoso de valles y montes, esixir distancies, amás de difícil, nun tien xacíu. Lo decisivo nun ye la distancia ente cortinos, sinón los canales, caminos, siendes y pasos que davezu siguen les abeyes. Víes estes que puen tar separtaes d’otres asemeyaes por una distancia curtia, pero de la cuál la so <<pertenencia>> a un cortín determináu ye perimportante pa caltener una bona producción de miel y pa la propia vida de les abeyes, qu’en casu d’alcontrase con otres nel so camín <<priváu>> podríen aportar a matase ente elles.

El derechu d’aldu tamién yera y ye parte de los arrendamientos de cortinos. Un exemplu históricu -dánoslu García Linares- ye l’arriendu dau el 15 de xineru de 1798, en Pola d’Allande, por José Rodríguez de Llano, col so fíu Joaquín, casáu, vecín de Villaverde, d’un puestu esterioráu y cayíes la metá de les sos paredes, d’un puestu y cortín de poner truébanos llamáu Castros de Felgueirosa, nel llugar de Prada, col so aldu, pastos y pertenencies.

Podemos, poro, afirmar que l’aldu ta perdafechamente auníu a la producción que se fai nos cortinos y que se llama a lo que podríemos denomar <<costume del país>> pa reclamar la so presencia y la so vixencia.

Dende estos datos y tando a lo que resulte d’un trabayu de campu que nos permita poner con precisión y seguranza les llendes d’esta figura -de la cuál la so <<xuridicidá>> nun tien dulda a la vista de la bayura de la información que nos da García Linares sobre los pleitos qu’hebo alredor d’ella- podemos adelantar la definición que va darréu:

Derechu d’aldu: Derechu que tienen los propietarios y arrendatarios de colmenales asitiaos en cortinos d’usar y caltener llibre de torgues un espaciu únicamente de so del cuál la so superficie ya orientación tan en función de la forma del terrén, qu’abarca’l vuelu, les rutes, canales, caminos y siendes y pasos -davezu de xubida y de baxada cuando los cortinos tan allugaos en terrenos pindios- que siguen les abeyes nel so camín d’entrada y salida a los dichos colmenales y que tien de ser respetáu  por terceros, tanto a la hora de construyir cortinos nuevos, como a la de desendolcar cualquier actividá de plantación o colocación d’estorbos que torguen dafechamente o faigan difícil l’exerciciu d’esti derechu.

Bocarón, aldu... el Derechu Consuetudinariu ye un derechu vivu. La Compilación a la que-y dio'l preste la Xunta Xeneral magar la so exautitú y lo representativa que ye pue que necesite <<ponese al día>>, amestando-y, depués de los estudios ya investigaciones precisos, les figures que la realidá de la riqueza consuetudinaria va amosando.

Editor: Ignacio Arias Díaz

Añadir Comentario

Envíanos tu comentario:

Formulario de Nuevo comentario

Autor:

Correo Electrónico:

Comentario:

Escribe el texto de la imagen:

(6 caracteres)

Volver